Lidzija Zabłockaja razam z žanichom Antonam Malutam. Skrynšot storys u jaje instahramie
U 2011 Lidzija Zabłockaja vystupiła za Biełaruś na dziciačym «Jeŭrabačańni». Tady školnica z Mahilova zaniała 3 miesca. Skončyŭšy škołu, dziaŭčyna vyrašyła pastupić u Instytut žurnalistyki BDU, a paźniej stała pracavać na telekanale «Biełaruś 1» — heta była jaje mara.
U 2019 hodzie Zabłockaja i Maluta skončyli BDU i raźmierkavalisia na BT. Fota ź instahrama Lidzii
Ciapier Zabłockaja zdymaje siužety ŭ asnoŭnym na temu kultury.
Adpačynak žurnalistka vyrašyła pravieści razam z žanichom u Jeŭrasajuzie. Abrańnik Lidzii, Anton Maluta, pracuje na Biełteleradyjokampanii ekanamičnym ahladalnikam i raskazvaje hledačam, jak u ajčynnaj ekanomicy ŭsio dobra.
Niadaŭna Zabłockaja apublikavała ŭ storys zdymki z Hiermanii i padpisała: «Moj adras nie dom i nie vulica, moj adras siońnia HDR». Jana taksama pažartavała: «Picier? Nie, Bierlin uziaty». Zakachanyja zapościli sełfi kala Branderburhskaj bramy, a potym pajšli pić pienistaje vino ŭ Augustiner am Gendarmenmarkt.
Kałaž storys u instahramie Zabłockaj
Svaich prałukašenkaŭskich pohladaŭ Zabłockaja nie chavaje. Lidzija zachaplałasia tym, što Kupałaŭski teatr praciahnuŭ pracu paśla taho, jak adtul pajšli artysty, jakija byli suprać hvałtu i falsifikacyi vybaraŭ:
«Jakoje ščaście, što Kupałaŭski nie syšoŭ u niabyt, vydužaŭ! I siońnia debiutanty harać kreatyvam: jany repietujuć, staviać novyja śpiektakli dla lubimych hledačoŭ».
Kałaž storys u instahramie Zabłockaj
Asudžała reparciorka byłych kaleh pa scenie. Jana ličyć, što 15-20 hadoŭ tamu ŭ Biełarusi šou-biznes byŭ na piku, a potym situacyja pahoršyłasia praz «šalonaje žadańnie pakłaści ŭ kišeniu tysiaču-druhuju». Lidzija adznačała, što ź ciaham času — asabliva ŭletku 2020-ha — i šou, i biznes «zahnailisia». Pryznavałasia ŭ rasčaravańni ŭ niekatorych artystach. Asabliva jaje aburyŭ učynak hrupy NaviBand:
— Zdavałasia b, voś źjavilisia tyja ludzi, jakija zdolnyja stvarać sučasnuju muzyku, prasoŭvajuć movu, ja ščyra ŭ ich vieryła, słuchała, zachaplałasia. I raptam jany stali śpiavać «palityku» i siońnia prasoŭvajuć svaju tvorčaść — ci heta ŭžo biznes? — tym, što raźmiaščajuć na svaich polskich afišach bieł-čyrvona-bieły ściah.
Skrynšot storys Zabłockaj u instahramie
Lidzija raspaviadała ŭ intervju «SB», što siabry-ajcišniki nibyta prapanoŭvali joj i kinuć kamień u AMAP, i paŭtaryć učynak žurnalistki Maryny Aŭsiańnikavaj, jakaja źjaviłasia ŭ efiry rasijskaha Pieršaha kanała z antyvajenym płakatam.
Darečy, jaje ŭčynak Zabłockaja taksama krytykavała:
— U mianie jość šmat pytańniaŭ da hieraini hetaj historyi. Kali ty pracuješ u dziaržstruktury, to, napeŭna, čytała statut arhanizacyi, pierš čym jaho padpisać. A kali padpisałasia, aŭtamatyčna pryniała ŭmovy pracy. Zaŭsiody jość vybar — možna pajści pracavać na inšy kanał, z supraćlehłymi asnovami, pohladami, matyvami… Atrymlivajecca, što supracoŭnica Pieršaha kanała doŭhija hady chłusiła samoj sabie, zdradžvała sabie, joj byli čužyja tyja kaštoŭnaści, za jakija jana vystupała. Dyk navošta tady było pracavać? Dziela hrošaj? Viadoma, jašče asiarodździe vielmi mocna ŭpłyvaje, całkam dapuskaju, kali karespandent pa-čałaviečy zaležyć ad čužoj dumki, to jaje mahło nakryć infarmacyjnaj chvalaj.
Tym časam inšym supracoŭnikam dziaržaŭnych struktur u samych roznych śfierach nastojliva rekamiendujuć nie jeździć u «niesiabroŭskija» krainy.
Čytajcie taksama:
Na dziciačaje «Jeŭrabačańnie» adpravicca Lidzija Zabłockaja + videa
Na dziciačym «Jeŭrabačańni» Biełaruś zaniała treciaje miesca
Jak vyhladajuć siońnia biełaruskija ŭdzielniki dziciačaha «Jeŭrabačańnia» FOTY
